وفتّح بواب الكنز
جنّ السحر
جنّ الشعر
وما في حدا يعينو
بيفيض عن قلبو الحكي
بيحكي
بتجفل عواميد الشعر بترجع نثر
بتمشي القصايد عالجمر بيحكي
بتوقع عن شفافو العِبر
إمشوا ورا صوتو
إمشوا معي نلمّ الصور . . .
طلعوا ملوك الجنّ
مشيوا ورا سطر النمل
فكّ الرصد
فرّق شمل
جمّع شمل
تخلّخل قفل بالباب
انصرّ الحكي بحجاب
ويكتب للمحبِة كتاب
ع حجارتو وطينو
بدو حدا من الإنس
يخاوي شياطينو
خيَّال ع حصان الحكي…
جايي
شکّشكّ الفصحى بالخرز
صار الحكي يضحك بالمرايِة
هالقَدّ بدّو من اللغة تيعمّم حكايِة
جايي وجايب قهوتو المرّة
وكنز الحكي مرصود من برّا
وَقّف ع باب الكنز
وصار الحكي بالرمز
كتب الطلاسم ع الرمل
وبخور شرد بهالسهل