مشّ أوّل مرّه بيهجم الموت عَ صالون العشرين وبيشلحّو شاعر من شعراؤو الكبار، عصام العبدالله شاعر صالون العشرين الاول صاحب سطر الرمل ديك العرب حمل صوتو الختيار ومشي
ضلّ يضحَك ت قفي
كان مطرحو بيناتنا صار مطرحو فوق بين هلْ الغيمات وحدّ النجوم العاليي
كان مهر الشعر صار مهر السما
باشق كبير جوانحو طوال من الغيمه لَ الغيمه من هون شايفينو ملقّط بنجمه بيضا وعم يزيّنا ت تصير عروس
عصام مات وما عرف ما حدا منّا استرجى يخبرّو ولا يوم شفناه زعلان عطول عم يصحَك عم ينكّت وازا بتسالو عن الموت بيقلّك متل النعس متل النوم بعد التعب ساعه ع ايد ملاك
ويمكن عصام يكون مات اكتر من مرّه وما قلنَا ولا يوم قلنا آخ ولا يوم ودّعنا ولا يوم قلنّا انا رايح عطول كنّا نشوفو جايي متل الجبل متل الحلم جايي
عصام حلم وطار علاّ كتير
مرَق العمر بكّير من حدّو وما اشتلق انّو مرق كان ملهي بالقدس بسطر النمل
كان وحدو عم يظبّط نومتو عَ التخت
كان عم بيلمّع تيابو ت تصير تلبَق لَ مشاويرو البعيده
قصايدنا حزينه والشعر من بعدو ضيعه يابسه
عصام عرف يسوع جايي ع الارض سبقو ع المغاره ونام بمزود القشّ صار يسوع الشعر صليب الكلمه قبالو شعَرا نضاف وحدّو معلف نجوم
باسمي واسم صالون العشرين الادبي منو دعّك يا عصام ومنقلّك ونحنا بعيد الميلاد السما حلوي كتير
عملا لعِبْتَكْ