العَنْقُود
مَا في مديْنهِ إسْمها بَيْروُت
بَيروُتْ عَنْقُودِ الِّضيَعْ
لمَّا استَوَى بالصَّيْفْ
وِالسِّكَّرْ لَمَعْ
طِلِعِ الصَّبيْ عَالحَيْطْ بَدُّو يْقَطّْفُو
مَا طَالْ!!
إِمُّو تقلوَّ نزالْ
بَيُّوّ يقلو هَلَّق بتُوْقَعْ
عَفريْتْ يِمْكِنْ هالصَّبي
وْمَا كَانْ عَمْيِسْمَعْ
جَابِ العْصَايي ولَوَّحَا
صَابُو..!!
وقْعُوا الضِّيَعْ
وِتْفَرفَطِ العَنْقُودْ
حَبِّه وَرَا ضَيعَه وَرَا حَبِّه
وِِقْعُوا عَلَى تْيابُو
وِتْوَسَّخُوا جِيابُو
وِقِعِ العِنَبْ؟؟
بَعْدا العرِيشِه مشَبَّكِي
وِالْخَيْطْ حَدِّ الخَيْظْ
وَبَعْدوُ الَّصبي عَالحَيَطْ!!!
َرَكِةْ التكَّوِيْنْ
نَقَّطْ قَلَمْ اللَّه حِبِرْ
صَارتِ سَما
وِتجَمَّعِتْ وِتْجَمَّعِتْ صَارِتْ بَحِرْ
وِصِلِ البْحَرْ عَالشَّطّ.. وتْمَشَّى
وْنَسَّمْ هَوا رَمْليْ
وِقِع الرَّمِلْ بالميّْ
صَارِتْ أَرِضْ!!
طُلْع السَّمَكْ عَالبَرّْ يتْشَمَّسْ:
كِتْرُوا بْيُوت النَّاسْ
كِتِر الشَّجَرْ
شايفْ كإنّا بِدْيِت الحَفْلِه
وسَمَّيتْها بَيْروُتْ
طُلْعِتْ منِ رْمُوشِ الزَّبَدْ
كا إنّها كِحْلِه