بَوّابةِ الْمَوتْ مَعْمُولِه مِنْ حَجَرْ ياقوتْ
وْبِتْفتِكرْ مرّاتْ إنّا عاليه
ما بْظُنْ
بَوّابة الموتْ أوطى مِنْ سَقِفْ تابوتْ
تَتْفُوتْ
بَدّكْ تِنْحِنيْ وتُوقَعْ
وِيْلِمَّك تْرابِ الأرضْ
تْشوُفْ الخليقه نايمه
وِمْغَطِّيا بِجْوانحو طَيْرِ السّْكوُتْ
وْفِي ناسْ مشْ مثل البشرْ
بِيقَربوا عالموت هِنيّ وْوَاقفينْ
متل الكلامْ بْيِبْتدِي بألله
وِبْينْتِهي بآمينْ
بِيقرّبوا عالموت هنيّ وُوَاقفينْ
بِيصيرْ يِعلا البابْ
عَا قامتُن بيصير يِعلا الباب
وِبْيِمرْقوا
مِتْل الْكَإنّو البابْ صارْ كتْابْ
بِيصَوّرُنْ
تابَعْدْ ما تْفيقِ الدِّنِي يِتْذَكَّرُنْ
بْيِحْدِيلْهُن
بِيْضَيّفُنْ قبل النعس رَحْمانْ
وْبِيعَلّقُنْ رِمانْ بالبستانْ