سَطْرِ النَّمِل

بْتِفْتَحْ بِنِتْ
بِيْلَبِّسَا إسْمَا
بْتِفْتَحْ قَصِيْدِه
بْيِكْتِبا
بْيِطْلَعْ عَ سَطْحِ الْمَمْلَكِه
وِالْمَمْلَكِه وَرْقَهْ
بِيْصِيْر أَعْلَى كْتِيرْ
بِيْمِدّْ إيْدُو عَ البَرِق
وِبْيُقطُفِ الْبَرْقَهْ
وْبِيْسَمِّيَا فَيْرُوزْ
اللَّوْنِ الْـ نَقَلْ مِنْ مَطْرَحُو
بِيْ هَالسَّمَا الزَّرْقَا!!!
مِشْ شَايْفَكْ
عَلِّي الْحَقِيْقَه شْوَيْ
وَطِّيْ
إِجِتْ فَيْرُوز
دِقُّولْهَا
مِتْلِ الْحَمَامِه الرَّاجْعَه
تَ تْطُلْ عَا بَيَّا النِّسِرْ
غَنُّولْهَا…
مِشْ سَامْعَكْ
بَدُّنْ وَقِتْ تَا يِسْكتُوا
وْوَقْتَكْ مَعكْ…

شُو بْيِشْبَهُو
سْكُوْتِ التَعَبْ!
حَطِّ الْقَلَمْ عَ الطَّاوْلِه
حَطِّ الْوَرَقْ
حَطّْ إِيْدُو حَدّْهُنْ
رَاسُو مِتِلْ شِي مَمْلَكِه
وِمْطَفُّيِهِ
قْبَالُو الأُوْضَه وَاضْحَه
الشّبَّاكْ
صَوْتِ الْمَرَا
وْلاَدُو
مْأَكَّدْ مَرَقْ مَنْصُورْ عَا بَالُو
بَيْنُو وْبَيْنِ الْبَابْ
في فَشْخَه
بَيْنُو وْبَنِ خْيَالُو…
مْمَدَّدْ
مِتْلِ الْـ كَأِنُّو عَمِ يْنَامْ
مْمَدَّدْ مِتِلْ وِقِعِ السَّكِتْ
حَدِّ الْكَلَامْ
مْغَطَّى بْبَيَاضُو …
اللَّوْن بِيْرِدِّ السَّلامْ …
حَامِلْ أَسَامِيْ
وْدَايِرِ يْسَمِّي
بِيْدِقّْ عَا لِبْيُوتْ
بِتْضّوِّي

مَا ضَلْ فيْ إِلَّا الشِعِرْ
الْجِنِّ اللّي قَاعِدْ بِالْخَفَا
خَطَفِ الْوَقِتْ
خَطَفِ الْمَسَافِه الْـ صَادَفا
وْعَمْ يِنْتْبِهْ مَاشِيْ
وْتَا مَا حَدَا يْفَكِّرْ بـ إِنُّو يِلْحَقُو
وِيْشُوفْ نِيَّاتُو
بيِمْحِي اللِّي زَايِدْ بالحَكِي
بيِنْفُخْ عَ دَعْسَاتُو
مَا كَانْ في عِنْدُنْ وَرَقْ
جَابُوا الْهَوَا
إنْتِ الْهَوَا دَفْتَرْ
مَا تْسَاعْ إِلَّا الشِّعِرْ
عَاصيْ وِقِفْ حَامِلْ قَلَمْ
مِتْلِ الْعَصَايِه هَالْقَلَمْ
عَمْ يِرْفَعُو
وْيِكْتُبْ عَلَى وَرَقِ الْهَوَا
غْنَاني وْطَرَبْ
الشِعْرِ اللّي عُمْرُوا مَا انْكَتَبْ
حَتَّى تِعِبْ عَاصِي
وْدِبِلْ مِتْلِ الْعِنَبْ
صَارْ كَرْمِ زْبِيبْ
بْتِمْرُقْ سِنِه وْحَدَّا سِنِه
وِالْكَرِمْ عَمْ بِيْطِيبْ
عَاصِي تِعِبْ

مَا كَان في عِنْدُن وَرَقْ
تَا يِكِتْبُوا
وْكَان الْحَجَرْ
صَايِرْ غَ آخِرْتُو
رَمْلِ وْرَمِلْ
شُو بْيِعْمَلُوا
تَـ يْخَبُّروا عَنْ حَالْهُنْ
تَـ يْعَلّْقُوا حَبْلِ الأَسَامِي
قْبَالْهُن
وِوْلاَدْهُن
نُقْطَه وْنُقْطَه يْنَقّْطُوا
مْنِ تْيَابْهُنْ؟!
شو بْيِعْمَلُوا؟
بِيْجَرّْبوا وِبْيِلْعَبُوا:
سَطْرِ النَّمِلْ
أَوَّلْ كِتَابِه عَالرَّمِلْ!!!
مَا طَوَّلِتْ
مَارِقْ حَدَا إِسْمُوا الْهَوَا
وْمَرَّاتْ إِسْمُو الرِّيْحْ
شَافُوا النَّمِلْ
خَافِ وْمِشِيْ
مِنْ مَطْرَحُو عَ الزِّيحْ
وِتْخَرْبَطِ الْمَعْنَى
وْصَارِ النَّمِلْ تَحْتِ الرَّمِلْ
صَارِ الْحَكي تِلْمِيْحْ!!!