مَرْيَمْ

بِيشَرْقِطِ نْجُومْ وْكَواكِبْ
طَوّلوا عَ رْفُوفهُن

هَيْدِي الْعَرُوسِ الْإسِمْها مَرْيَمْ
بِالْأزْرَقِ الْفَاتِحْ
مِتْلِ الْكَإنّو فِي سَما
وُصْلِتْ مِنِ مْبَارِحْ
هَيْدِي الْعَرُوسْ الْإسِمْها مَرْيَمْ
بِالْأزْرِق الغامِقْ
مْنامْ وْإجا الرسّامْ
تَايِرِسْمُو وِيفَيْقُو
لاقَى الرّسِمْ فَايِقْ
هَيْدِي الْعَرُوسْ الْإسِمْها مَرْيَمْ
وِالدّهرْ عَالشّباكْ
بِيشُوفْ إنّا وَحْدها
بْتِمْشِي مِتْلِ لا قَبِلْها وْلا بَعِدْها
وَحْدا الْعَرُوسْ وْغاب مِنْ حَدّا الْعَرِيسْ
وْكانِ الْوَقِتْ يِمْكِنْ خَمِيسْ
يِمْكِنِ الْجِمْعَه
يِمْكَنِ نْهارِ الْسّبِتْ
طَرَفِ الْوَقِتْ
بِيعِدّ إيّامِ الْمَضِتْ
بِيِحّْطها تَحْتِ الْتّخِتْ
وَحْدا الْعَرُوسِ الْإسِمْها مَرْيَمِ
اللَّه عِمِلْها مِنْ حَلِيبْ الرّيحْ
تا تِنْتِبِهْ حَوّا مْنِيحْ

وَقْتِ اللّي ضَوِّتْ شَمْعِتا
تَتْشُوفْ إنّو صُورِتا مِشْ صُورِتا
تَتْشُوفْ إنّا صُورْتو
وْإنّو تَرَكَ عَ مْخَدِّتا
رُوحِ الزّمانْ
الْعِرْفِتا مِنْ رِيحِتَا

نكَايِه بِحَوّا قالْ لَـ مَرْيَمْ
بَدِّكْ صَبِيْ وْما يِقْرَبِكْ رِجّالْ
مِشْ مَعْقُولْ.
إلاّ إذا بَدّي أنا إلْعَبْ
بِقْعُدْ بِعِبِّكْ عَالْهَدَا
بِتْخَلْفِيني بَعِدْ تِسْعِ شْهُورْ
مِتْلِ الْكَإنّو ما حَدا خَلَّفْ حَدا
وْبِيضَلّْ جِسْمِكْ نُورْ عَا بَلّورْ

الإمّْ الْبَلا شَهْوهِ
أوّلْ شَهيدِه لِلْجَسَد
وِبْظنّْ ما زادِ الْعَدَدْ
حُلْو الْدّهِرْ بِالّليْلْ
لمّا بْيِفْتَحِ الشّباكْ
وْبِيطُلّْ
سَامِعْ عِرِسْ بِالحَيّْ
صْواتُنْ قَريبِه
وْعَمِ تْخِشّْ دْفُوفهُن
بِيجاوْبُوا بِكْفُوفْهُنْ
سامِعْ عِرِسْ
عَمْ يِلْمَعوا غَنّوا عَ حَدّ سْيُوفْهُنْ
صَارِ الْقَمَرْ خَنْجَرْ
بِيسِنّْ حَالو عَلْعَتِمْ

مِنْ وَيْنْ نِزْلِتْ شَهْوِتُنْ
مِنْ وَيْنْ
ما بْيِكْتَروا إلاّ إذا صَاروا اتْنَيْنْ
هوُّي اللّي ضَوّا الطّيْنّ
عالْمَيْلَيْن
تا يِمِرْقوا طْيور الْحَكِي
اللّي طَـيّرُن بَعْدَيْن

حَوّا اللّي لِحْقِتْ آدَمْ
مِنْ الأوّلِ الأوّلْ
نِسْيِتْ حَدا قَبْلُو
راحِتْ عَ شَغْلِه شَافِتَا
وْكانْ بَدّو تْرُوحْ
صَوْبْ شَغْلِه حَسِّتا
هُوِّي
هَالغامِضِ الْمِنْحِسّ إنّو حَدّنا
وْمِنْحِسّ إنّو ضِدّنا
لمّا عَنِ التّفاحْ بَدّو يْرِدّنا

مَقْهورْ مِنْ حَوّا
حَوّا اللّي شافِتْ جِسْمْها
مِتْلِ الخَطِيّه جِسْمها
مَعْمُولْ مِنْ رُوحِ الْطَّرَبْ
قَنّينةِ نْبيذ
وْسِكرْ دِيكِ الْحَطَبْ

مَقْهُورْ مِنْ حَوّا
بِتُخْطُرْ عَ بالو مَرْيَمْ
اللّي صَوّرا بَعْدَيْن
الْبِنْتِ اللّي طَفّت شَهْوِتا

بْيِشْلَحِ تْيابِ الشُّغُلْ
وْبِيعَلّقُنْ مِتْلِ السْنِينْ
مْبَيّنْ كَإِنّو آدَمِ تْحَرّكْ، عِرِفْ
آدَمْ مدَوّرْ كانْ مِتْلِ تِفّاحه
وْلَمّا سِمِعْ صَوْتِ الْمَرا
دِغْري وِقِفْ
مِتْلِ الألِفْ
آدَمْ، وْحَوّا شافْتُو
وِتْطَلّعوا بْبَعْضُنْ
مِتْلِ الْكَإنّو فِي خَجَلْ
مارِقْ حَدا عَمْ يِجْرَحو
وْعَمْ يِسْمَعُوا صَوْتو مِتْلِ مِفْتَاحْ
بِيْدُورْ بِـ بابِ الْحَكِي وِبْيِفْتَحو
ما تاكْلوا تِفّاحْ
ما بْيِسْمَعوا بِيقَرّبُوا
ما تاكْلوا تِفّاحْ
ما تِغْلَطوا خَلّوا الْوَقِتْ مِرْتَاحْ
بِيطَنّشوا وْبِيقَرّبوا
بِتْقَطّفِ وْبِتْناولوْ التّفاحْ بِـ خَيْرُو
وْكِلْ ما أَكَلْ بِسْتانْ
بِتْناوْلو غَيْرُو

وْما كانْ عامِلْ هَالِحْسابْ
بَدّو الْمَرا تِمْرُقْ هَوا
وِتْصيرْ دِغْرِي غْيابْ
بدّوا الْمَرا ما تَعْرِفِ الشّهْوِه
تْشِيلِ الْأساوِرْ وِالْحَلَق
تْخَلّي الْحَبَقْ
يِغْلِي مِتِلْ جَمْرِ اشْتَغَلْ
تَيْفَوّرِ الْقَهْوِه

وْلمّا سَألْهُنْ وَيْنها رَدِّ الْعُمُرْ
الْبِنْت اللّي عَمْ تِسْألْ عنا
كِلْمِه وْغِرْقِتْ بِالْحِـبِرْ

هاتُوا حْقُولْ الواسْعَه
مِدُّوا الْوَرَقْ
غُطّوا السَّرْوْ بِالمَيّْ
جَايِ حدَا يْفِكّ الْحَرِفْ
يِرْسُمْ خَلِيقَه يْرَتّبا مِتْلِ الجِمَلْ
وِيْبَلِّشا بْحَرْفِ الْألِفْ
آدمْ
أوّلْ كَلاَمْ بْيِنْعَمَلْ مِنْ طِينْ
أوّلْ نَحِتْ لِلصّوْتْ
أوّلْ تَرْجَمِه
أوّلْ حَياةِ مْزَيّنِه وِمْهَيّأه لِلمَوْتْ
أوّلْ مَلْحَمِه
آدَمْ دَكَرْ مِشْ عاجْبو
بِيضِيقْ خِلْقُو مِنِ الرجال كتير
بَدّو مَرا تِبْكِي بِنِصِّ الليلْ
مِنْ فَرْحِتا بِمْرايِتا
وْتُفْرُكْ عَ عَنْقُودِ الْعِنَبْ
تِتْـرُكْ وَجَعْ وِتْطيرْ

وْما كانْ باقِي طِينْ
بِيْمِدْ إيدُو عا صِدرْ آدَمْ
بِيشيلْ ضِلْعِ بِيِعْملوا حَوّا
وْبِيمَلّسا
شُو ناعْمِه
بْيِصْبُرْ عَليها، بْيِعْتْنِي فِيها
وْبَعِدْ ما يُنْفُخْ فِيا وِيْخَلّصَا

وْكانْ وَحْدُو كْتِيرْ
مْدَوّرْ مِتلْ سِرّ وْوِقِعْ بِالْبيرْ
كِلْ ما كِتِرْ بِيصيرْ مِتلِ بْعيدْ
وَحْدُو الْعَتيقْ
ما كانْ مَرّه جْدِيدْ
وَحْدُوا اللّي قاعِدْ بَيْنَكِ وْبَينكْ
وَحْدُو اللَي قاعِدْ فِيكْ
طَوّلْ لَحالو وْصارْ يِتْسَلّى
وْيِتْخَيَّلَكْ
تَيْلَعْبَكْ
يِمْكِنْ إذا ضّوَّا السّما
وْيِمْكِنْ إذا طَفّى السّما يْسَلّيكْ
النّسْوانْ ما كانوا حَدا
فاقْ الدّكَرْ وَحْدو
جَايِّ عَ بالو رْفيقْ
فَكَّرْ بِإنّو لوْ عِمْلَ حَدُّو مَرَا
يِمْكِنْ مَزاجو يِصِيرْ أحَلى شْوَيّ
بِتْلَعّبو
بِتْعَطّشو وْبِتْشَرّبو
وْبِتَمِدّ إيدا مَيّ
بِيْصِير الحَريقْ
دايرْ يْفَتّشْ تا يْلاقي بِنِتْ يِقْرَالا شِعِرْ
يْمَلّسْ عَلَيْها بِالحَكِيْ
وْيِفْرُكْ عَلى رُوح الْحَبَقْ
وِيْشِمّْ كَفّو عِطِرْ
الْبِنْت الْمِتِلْ كِلْمِه
عا رَاسْ صَوْتُو لَعَّبَا مِتْلِ الْسِّحِرْ