مَيّلْ عَلَيْنا تَحْتْ بِـ بَيروتْ
مَيّلْ عَلى الْقَهْوة
مِيِلْ مِتِلْ هَبِّ الْحَرِيرْ وْغَلّْ بِـ هَالتُّوتْ
مَيّلْ مِتلْ رَنِّ الضُّحُكْ
وِرْجالْ عَمّا يِلْعَبُوا ما تْساعْهُنْ لِبْيُوتْ
وَشْوِشْ شِعِرْ حَتّى الْفَضَا ما يِشْتْلِقْ
مِتْلِ الْكَإنُّو الشّعِرْ تِهْرِيبِه
قِلِّلي قَصِيدِه بْجَاوْبَكْ بِالَسّرْ
وْمِنْقِلّهُنْ لمّا حَدا يِسْألْ
نِسْوانْ عَمْ نِحْكِي عَنْ النّسْوانْ
بِيْصَدّْقُوا
النِّسْوانْ دارْ مِشَعْشْعَه
وِالشِّعِرْ تِخْشِيبِه
ما بْتِتْعَبْ وْبِيضَلْ فِيكْ تْدُورْ
عاحالَكِ عْلَيْنا
وْشُو صار لَوْ دَبِّ التّعَبْ
بْتِطْلَعْ عَ حَيْطِ الْبَيْتْ فِي بِرْوازْ
بْتِرْتاحْ بِالْبِرْوازْ
بِتَصِيرْ صُورَه مْعَلّقَه وِقزازْ
وِبْتِبْتِسِمِ وِبْتِضْحَكِ عْلينا
هَيْدا ضَربْ يا جُورجْ عَمّا تَعْملو فِينا
بِتْضَلّْ شَبَّ وْقادِرِ تْحَطِّبْ بِبِسْتَانَكْ
وبْيُوقَعْ عَلْينا الْوَقْتْ
وْبِنْصِير نِتْغَلْبَطْ بِعِنْوانَكْ
كَإنّو بِالْهَوا ماشِي
دَايِرْلْنا ضَهْروُ
وْلَّما صْرَخْتْ يا جُورجْ
سْمِعْت الصّدَى وْحَدّي وِقِعْ صَوْتِي
وْما عِدْت عارِفْ مِينْ عَمْ يِحْكِي
يِمْكِنْ أنا وْخَيِّي وْإمّي وْبَيتْنا
يِمْكِنْ لَحالُو جُورجْ عَمْ يِبْكِي
لا بْتَرْجَعْ وْعَنْ جَدّْ ما بِتْغِيبْ
يَعْنِي عَمِ تْدُورْ
عاحالَكْ عْلَيْنا
دَقّوا الشّبيبِه قَهْوِتُنْ
تَحْتِ الْشّجَر عالِي لإنُّو مِنْ زَمانْ
دَقّوا الْحَكِي حَتّى انْتَلى الْمِيدانْ
حَسُّوا بِإنّنْ نَاقْصِينْ
عَدُّوا صَبِيْعُنْ ناقْصينْ
عَدُّوا الشّجَرْ ناقِصْ
عَدُّوا الْأغانِي نَاقصينْ
عَدُّوا القَصايِدْ ناقْصَه اللّمْعَه
عَدُّوا السّكايِرْ زَايّدِينْ
وَحْدا سِيكارَة زايْدِه وِمْوَلّعَه
وْقَالوا لَبَعْضُنْ جُورجْ
قَاعِدْ عَم يْدَخِّنْ مَعُنْ
وْمِنْ كِلّْ بِدّ بْيِسْمَعُنْ
وِالْوَقْتْ عَمّا يْمُرّ مِنْ حَدَّكْ
ما يْشُوفَكْ وْلا إنْتْ فِيْكِ تْشُوفْ
وْما عادْ فِيكْ تْعِدّْ إِيّامَكْ
مِنْعِدّْهُنْ عَنّكْ
صَرْلْكْ سِنِي يا جُورجْ عَمْ تِمْشِي
وِبْظُنْ إنّكْ عَمِ تْدُورْ
لا بْتِرْجَعَ وْعَنْ جَدّْ ما بِتْغِيبْ
يَعْنِي عَمْ تْدُورْ
عا حالَكْ عْلَيْنا
عَالْبَيْتْ عَمْ تِتْفَقّدُو وِتْرَتْبو
وِتْغَطّيُنْ بِاللّيْلْ
رامِي بِيخَبّرْ شافَكْ مِنِ بْعِيدْ عَمْ تِضْحَكْ
وْإنّك عَمَهْلَكْ جِيتْ صَوْبُو ما وْصِلْتِلُو
وْلا هُْو قِدِرْ يُوصَلْ عَفَيِّ جْوانْحَكْ
وْإنّو حَدا مَحَّاكْ
وْإنّو بِكِي وْإنّو عِرِفْ
وْعَنْ جَدّْ هُوِّي مْسَامْحَكْ
بِيخَبّرِ وْبِيْخَبِّر وْبِيقُولْ
كِلّْ مَرّه شِكْل
مِتْلِ الْكَإنُّو كِلّْ يَوم بْيِكْشْفَكْ
تَيْأَلّفَكْ
مَاهِرْ بِيقُولْ سْمِعْت دَعْسِه عَالدّرَجْ
رْكَضْت فْتَحْتِ الْبَابْ شِفْتُو
مَرْحَبا لَجُورجْ يَمّينْ
طَالِعْ عَ إهْدِنْ جُورجْ قَلِّلي طْلاَعْ
وَطَيْلَعْ مَعَكْ،
حَكْيِ الْجَنانِي الْكَانْ إسْمُو شِعْر
تا نِسْمَعَكْ
مِنْحِبّ شُو جَايِبْ مَعَكْ
* * *
طَالِعْ عَ إهْدِنْ جُورجْ قَلِّلي طْلاَعْ
مِنْضَيّفَكْ خِبْزِ وْمِلحْ
مِنْضَيّفَكْ لَيْلِ وْصُبُحْ
مِنْخَبّرَكْ مِنَ وَيْن مارِقْ هالرّمُحْ
تا صارْ هَلْقْدّ الْجُرُحْ
مِنْحَمّلَكْ زَيْتُونْتَيْنِ زْغارْ
بِتْضَوِّيُنْ
بِيصِيرْ يُبْرُكْ هالْقَمِحْ
وِيْرِنّْ بِنْحاسُو الْفُصُحْ
طَالِعْ عَ إهْدَنْ عارْفَكْ إنّكِ مْشِيتْ
تِتْفَقّدْ مْنامَكْ
حامِلْ بِإيدَكْ ضَوّ إسْمُو الْشِّعِرْ
وْهَبِّ الْهَوْا وْطَفّاكْ
وِالْعَتْم قِدّامَكْ
بِتْصِيرْ مِتلِ الْمِخْتْفِي، مْبَيّنْ