كتبوا في رحيله – قصائد بالمحكية

مشّ أوّل مرّه بيهجم الموت عَ صالون العشرين وبيشلحّو شاعر من شعراؤو الكبار، عصام العبدالله شاعر صالون العشرين الاول صاحب سطر الرمل ديك العرب حمل صوتو الختيار ومشي ضلّ يضحَك ت قفي كان مطرحو بيناتنا صار مطرحو فوق بين هلْ الغيمات وحدّ النجوم العاليي كان مهر الشعر صار مهر السما باشق كبير جوانحو طوال من
[....]

وفتّح بواب الكنز جنّ السحر جنّ الشعر وما في حدا يعينو بيفيض عن قلبو الحكي بيحكي بتجفل عواميد الشعر بترجع نثر بتمشي القصايد عالجمر بيحكي بتوقع عن شفافو العِبر إمشوا ورا صوتو إمشوا معي نلمّ الصور . . . طلعوا ملوك الجنّ مشيوا ورا سطر النمل فكّ الرصد فرّق شمل جمّع شمل تخلّخل قفل بالباب
[....]

وِقف السطر عالخط صفّر بوليس السير ممنوع المرور نزلت من قزاز الاشارة دموع وِقف السير تسكرت كلّها بواب الحكي حملوا القصيدة عالنعش مشيوا سوا شارات سير وسيارات وناس وقفت طاولة بالنص مليون ضحكة وقهقهة وقعوا مِنا لفّوا النعش بشرشفا مشيت القهوة والكراسي بلا كلام/ وقت الصلا/ في كرسي ملك تنطّحت وقالت انا شيخ الكلام /
[....]

عالي اللعب هالكون لعبة مَسمَعك وما في حدن عميسمعك طفيّت تحت شعر المملكة وفلّيت بلكي لما سمعك يسمعك ... طفيت تحت شعر المملكة وفليت ... هونيك أجمل والطاولة أطول وفيك تضحك عالدني وأكتر وفيك تكتب شعر وفيك عتق الخمر وفيك تتسلى ويلعب معك الله

الى حبيبي عصام العبدالله.. حلو الحكي من تمك كرز بينزل على مهلو ع الطاولة ع الناس ع ضحكة مزينة بجراس بترن بترن وبتعن ع بالي حكايات عشناها وأفتح أنا خيالي وغطيك بحالي

للشاعر عصام العبدالله شارع… عيونو حمر ... غيابو مرق جابو بـِ لمحة عين عصام لا تقولو سكت أو صام كاتب قصايد في إلُن إيدين حتّا نْ غفي وما طَلّ منّو تنين يْفيقو القصايد يكتبو عصام كان الظلم عالأرض سمكو شبر والحرب عم تطحن كَسر البيوت وترابنا مقَطَّب قبر عالقبر

جِن الحَكِي ( تحية للمعَلِّم عصام العبدالله ) ..... كنَّا خِرِس بوقتهَا... كنَّا خِرِس لا صَوت لا صُورَة لا ضُحك ولا بكِي اللِغَّة حَبس والحرب بِ بيروت ما إلهَا نَفس تخلَص قَبل مَ تخُوض أخر معركِة وإلَّا الجَرَس بيرن : " بلّشنا الدَرس" ...... " وجن الحكي الواقف عَ باب المملكِة " مرَّق صَابِيعو فَوق
[....]

بيروت عم تبكي: بحر الحبر قدّيش مشتقلو، عرش الشّعر شو كان يلبقلو. بيروت عم تبكي: بيحكي حكي بيطلع شعر، بيقرا شعر بتفكّرو بيحكي

شو خربطو سطر النمل؟ معقول شغلة بال؟؟ شو اللي بعد م انقال؟؟ ... محروق قلبك يا حكي .. وقّف بكي ... بتضل "عنقود الضيع" بيروت.... تعصر على نبيذ الزمن موال ... كان في جبل ياقوت ... لابس الشعر خيال ... بردان ، بدّو حْرام.. جِبلو سهل الخيام

إلى روح الشاعر عصام العبد الله: الليلة القصيدة.. رح بتمشي حافية.. فوق الجمر.. من دون وزن وقافية.. لمّن لقى.. عْليك الدني مش كافية.. نجّد إلك.. سهل الخيام سرير.. لحافك سما.. من جْناح لِعْصافير.. ونزّل عليك الشمس.. دمعة دافية

خيّال… … وبالبال تْفَرْكَشْ جَبَل تَعْبان بِ عُمْرْ اْنْطَفا وَقَّعْ جْنَيْنِة صافْيِة مِتْلْ الوفا. متل شي نيزك برق. خَيَّال؛ خيّال مَرّْ وقال ملعون شغل البال... ... وهالعُمُر رَحْ فَلّْتو! غَرَّب حَمام القلب بَعْزَقْ غِلّْتو. هالعمر رح فلتو… تا شوف، مِنْ بَعْدي، لَمِينْ بَدُّو الصُبُحْ يِهْدِي طَلّْتُو؟ ما عاد يْقْدرْ يْقطْفو وْيرِشّ وِينْ ما مَرَقْ. فجأة
[....]

راكِب عصَهْوِة ريح وحامِلْ الرايي لْحِقتو أنا لْوحدي تا شوف شو القِصّة قلّلي صديقَك راح وبالقلب في غصّة رايح ع عمر جْديد تا يخلّص الديوان ويألّف رْوايي يقطُفْ ربيع الزَهْر يكسِّر قْناني العِطر ويْرِشّها عالجمرْ يطفّي سنينِ العمر و"من هَوْن مرّ القَهر" يِكتُب عالمرايي شِفْت العمر هِربان من العاصفِة الجايي بسرعة العمر عم يُهربْ عم
[....]

سمعت بخبر موتو فيّ انكسر ضحكي وحدّي وقع صوتو بفنجان بال البنّ صوتك بقي مفتوح بعدو البحر بيحنّ شبّاك ..درفة روح فوق الحبرْ غيمة بكي زغيري اللغة وملّبكي وشو ضلّ من عرس الحكي؟ إلا سطر مجروح!

مكسور... سطْر النَّمل خَيِّي عصام... من القَلَم سرْقَه فلَّيت... حافي مْشِيت عَ غْيابَك ولَ وَين؟!... ما باب السّما ورْقَه شالا هَوَا أزْرَق من كْتابَك ويا رَيت فِيِّي غافِل تيابَك البَيضا... وتحْتا تساعني المَرْقَه تا صِير "سطْر النَّمل"... عَ تْرابَك. كلمة الصديق الشاعر قزحيا ساسين في حفل تكريم الراحلين عصام العبدالله و خليل شحرور... ل عصام
[....]

شاف فنجانَك كسَر تمّو ولاقط دموعو بْمَلقط شْفافو! وشَطّك مشلقَح عَ رمل همّو والموج متل ولاد عَ كتافو! شِعرك كأنّو غيم طالع ع الشجرْ وضحكتك : بتشيل وتّاب الضجرْ لا نْحتت ضيعه مارقه بْبال الحجرْ ولاعْملت من ه العتم: برواز القمرْ ولانحتِتْ بزْميل الكلام سْكوتْ ولانحتت خيط العنكبوتْ! .. لمّا نْحَتت إيديك بتْراب البيوتْ فْتَحت
[....]